Vierkampf statt Velotour

S Wätter isch die Wuche leider nümm uf unserer Syte gsii und drum het dr Beat sy Velosummerstamm kurzfrischtig in Stadtkäller verlegt. Dört het, nach däm alli ytroffe sin, s Alternativprogramm gstarted. In vier Diszipline isch me sich tischwiis gegenüber trätte und het um so wenig Pünggt wie möglich kämpft. „Knoble“ het die erscht Disziplin ghaisse. Zerscht het me pro Tisch e Rundi knoblet und drnoch hän d’Verlierer vo de verschiedene Tisch im grosse Verliererfinal um die wenigschte Pünggt kämpft. Komplizierti Gschicht, i waiss.

Wyter isch’s gange miteme glatte Quiz, bi däm uns dr Beat bi ca. 22 Frooge in sämtliche Wüssensgebiet usegforderet het. Hätsch die eher spezielle Froog gwüsst? Wie nennt me e Spaghetti wo zwüsche de Zeen hänge blybt? (D‘ Löösig git’s ganz unde.)

Noch däm dr Beat unseri Biire zem Überhitze brocht het, ischs sportlich wyter gange. Vor em Yygang hetr e Dartschiibe ufgstellt und so isch me Tisch für Tisch go wärfe, in dr Hoffnig die högschte Fälder z’träffe. Dr Tisch mit dr högscht gworfene Durchschnittspunggtzaal het die Disziplin für sich könne entscheide und so isch’s denn wyter gange zur finale Disziplin.

S‘ isch nomol e Sportlichi gsi, Tischtennis! Jä richti ghöört, Tischtennis inere Baiz hän mr gspiilt und s het wunderbar klappt. Jede Tisch het sy Top Crack ins Turnier gschiggt und die hän denn in spannende Duell um die beschtmöglich Ändplatzierig für ihre Tisch kämpft.

Noch däne sportliche Högschtleischtige het dr Beat d’Räng verkündet und so isch denn dä „Wettstai-Vierkampf“ z’Änd gange. Die Aawäsende hän sich widr voll uf Ihri Spitzedisziplin, em Aastosse mit volle Bächer, könne konzentriere und wenn sy nit irgendwenn uusegschosse worde sin, schlöön sy sich hüt no dr Pingpongball um d’Ohre.

E grosse Dangg goot an Beat wo uns kurzfrischtig so e glatts Ersatzprogramm uf d Bai gstellt het!