Hüt stell i euch e ganz tolls Buech vor, s haisst „Jugenderinnerige an s'Glaibasel", gschriebe vom Werner Schweizer. Won is kauft ha, han i nonig gwüsst, as es e starggi Verbindig zur Wettstai het, aber wo i denn bim Kapitel „Fasnacht" aakoh bi, han i schöön gstuunt as scho in dr dritte Ziile d'Wettstai vorkunnt. Dr Werner Schweizer isch nämmlig e Ex-Wettstainlemer, vo 1961 bis 68 isch är bi uns Vordrääbler gsi. S ganze Kapitel het är dr Wettstai gwidmet mit viele glatte Gschichtli us synere Aggtivzyt. Was das für Gschichtli sin und wie dr Werner zur Wettstai koo isch, möcht i euch do aber nit verroote…
I ka euch nur empfähle, das tolle Buech z'kaufe, denn bim lääse vo Kapitel wie z.B. „Glaibasler Baize", „Vogel Gryff", „Eglisee", „D'Schuel" usw. ka me sich beschtens in d' 50er- und 60er-Joor vom letschte Joorhundert zrugg versetze. Die Jüngere unter uns könne so in e Glaibasel yydauche wo hütt völlig unbekannt isch und bi de ältere Semeschter kunnt villicht die eint oder ander scheeni Erinnerig an die eigeni Jugend wider uffe.
Z' kauffe gits das Buech unter anderem online bim Münsterverlag.