Schurgge-Dräff, das isch s Motto vo dr disjöörige Blausch-GV gsii.
Uf die Zwei het sich d Wältelite vom Bööse im Stadtkäller droffe. Vo Määrlibösewichtinne über harti Biker bis zu wältbekannte Drogedealer hesch alles könne aaträffe. Nochere kleine Flüssigverstärkig ischs loos gange uf e Waggel über die Mittleri Brugg dur s halb Glaibasel bis zur Wettstaibrugg, wo sich das üble Volgg für e baar Stündli zrugg zooge het zem s Wichtigscht bespräche. Im Lokal vom Fischer Club Basel het me drüber diskutiert, ob die ältischte Halungge in Zuekunft ihri eigene Coup sotte abzieh und ob die jüngschte, bim gröschte Verbräche vom Joor, scho sotte mitgnoo wärde. Glichzytig het me für e neui Organisation vom Kartell gstumme. So sin neui Drootzieher gwält worde und anderi hän sich zruggzooge. Au sin e paar Prospects definitiv in d Gang ufgnoo worde und zem sich no e letschts Mol bewiise, hän si bis noch em Znacht, zää Gegeständ vo ihrne Bandemitgliider miese stääle.
Noch däm ändligg alles klärt gsii isch, sin die üble Gstalte wyter zooge in Richtig Claraplatz, wo si sich im Käller vonere rivalisierende Gang, de Rätz, vergroche hän. Jä, au s eeländscht Volgg ka nätt si zue-e-nander und so hän si beschti Verpflägig dörfe gniesse. S Ässe het vorzüüglich gmundet und so isch me denn fit gnueg gsi, zem s an dr Bar loo grache. Abr devor het me no miese kontrolliere ob die Neue au guedi Diebe sin. S isch zwar no Verbesserigspotential umme, abr gschaft isch gschaft, si hän alles könne klaue! Jetzt hets kei Halte me gää und so isch bis in Sunntig iine gfeschtet und Tanzt worde zur Musik vom DJ Grösse. Am Schluss het me no gmainsam ufgruumt und isch drnooch in de dunggle Gasse vom diefschte Glaibasel untertaucht….ob au alli widr uftaucht sin, isch dr Redaktion nit bekannt.
Zem Schluss goot e riese Dangg an d Organisatorinne vo däm brand gföörligge Aaloss, an d Yael und d Nadine, s isch absolut herligg gsii! Ebefalls bedangge möcht i mi bim Team vo dr Rätz, wo sich beschtens um uns kümmered het.
